Matlèt sa a chita sou fonksyon dansite pwobabilite (fdp) ansanm avèk fonksyon distribisyon anpile (fda) pou plizyè kalite distribisyon pwobabilite, distribisyon diskrè osnon distribisyon kontinyèl. Matlèt la afiche pwobabilite total nan mitan de (2) limit tou.

Kit se yon (fdp), kit se yon graf (fda), tou 2 graf yo bay menm enfòmasyon yo apati ajansman koulè. Egz, nan tou 2 graf yo, limit la yo parèt an ble pou pwobabilite l epi an vèt pou pwobabilite u, epi pwobabilite total la ki nan mitan l ak u ap parèt nan koulè oranj.

Graf

• Graf anlè a montre nou fonksyon dansite pwobabilite a osnon fonksyon mas pwobabilite pou distribisyon nou chwazi a. Pwobabilite valè x yo ki nan mitan liy vètikal ble ak liy vètikal vèt la parèt byen klè ak koulè oranj fonse, epi pwobabilite total pou rejyon sa a parèt nan kwen dwat matlèt la, sou anba.
• Graf ki anba a montre nou pwobabilite distribisyon anpile a pou distribisyon nou chwazi a. Pwobabilite nan mitan valè x yo ki nan mitan liy vètikal ble ak liy vètikal vèt yo parèt tankou yon liy oranj sou bò gòch graf la.

Kontwòl

• Bouton radio distribisyon yo pèmèt nou chwazi distribisyon pwobabilite nou vle afiche.a. Lè nou chwazi yon tip distribisyon, sa tou dekachte glisyè ki kontwole paramèt distribisyon sa a.
• Glisyè x-min/x-max la fikse limit orizontal graf yo ni pou fdp ni pou fda.
• Lè nou chwazi Dyagram an Baton, fonksyon pwobabilite diskrè yo parèt sou fòm baton. Lè dyagram an baton pa aktive, graf fonksyon yo parèt sou fòm bwat. Se sèl lè nou chwazi distribisyon diskrè ke kontwòl sa a vizib.
• Liy limit yo pou pwobabilite, liy limit la yo se liy vètikal ki parèt nan tou 2 graf yo ki fikse bòn kalkil pwobabilite a pou nou. Nou ka deplase limit sa yo avèk sourit la. Liy ble a kontwole limit enferyè l epi liy vèt la kontwole limit siperyè u. Pwobabilite ki nan mitan 2 limit yo ap parèt ak koulè oranj. Valè l, valè u plis valè pwobabilite a afiche sou anba, tou pre kwen dwat matlèt la.
• Afichèt valè x ak y bay pozisyon sourit la nan nenpòt ki fenèt graf la. Yo parèt dirèkteman sou tèt afichèt valè l ak valè u.

© 2014 J. Shen, J. Orloff, J.-M Claus, J. Bloom, ak H.Miller